• Select Language >
  • Hindi
  • Gujarati
Home »Experts »Economy» Opposition All Side For New Seed Licensing Policy Of Government By Ajay Naik

કેન્દ્રની નવી બીજ પરવાના નીતિનો ચોમેરથી થતો વિરોધ

કેન્દ્રની નવી બીજ પરવાના નીતિનો ચોમેરથી થતો વિરોધ
(તસવીર પ્રતિકાત્મક)
 
સામાન્ય રીતે ખેડૂતોને ધ્યાનમાં રાખીને નીતિ બનાવાતી હોય છે. પરંતુ કેટલીક નીતિ એવી હોય છે કે, જે ખેડૂતો તથા નવી ટેક્નોલોજી માટે બાધાકારક બની શકે. 3-4 મહિના અગાઉ કૃષિ મંત્રાલયે બીજ પરવાના માટે એક નવી માર્ગરેખાની દરખાસ્ત રજૂ કરી હતી. આ માર્ગરેખા સામે દેશના ખેડૂતોએ બાંયો ચઢાવી છે. મોટા ભાગના લોકો એવુ માને છે કે, ખાદ્યાન્ન સુરક્ષા તથા ખાદ્યાન્ન ફુગાવો અંકુશમાં રહે તે જરૂરી છે. આ માટે ખેડૂતોને બીજ સંબંધીત સંશોધનોનો લાભ મળે તે જરૂરી છે. મોટા ભાગના ખેડૂત સંગઠનો આ નીતિને ખેડૂત વિરોધી માની રહ્યાં છે. જો તેનો અમલ થશે તો ખેડૂતોને નવી ટેક્નોલોજી મળી શકશે નહીં. ગુપ્તપણે ટેક્નોલોજી અપનાવવી અને તેનું વેચાણ થતું અટકશે તો 2025 સુધીમાં 5 કરોડ રોજગારી ઊભી કરવાનું જે લક્ષ્યાંક છે તે સિદ્ધ થાય તેમ નથી. નવી નીતિ સ્પષ્ટપણે એવુ જણાવે છે કે, આને કારણે જી.એમ. ટેક્નોલોજી સરળતાથી ઉપલબ્ધ થશે નહીં, પરિણામે ઇનોવેશન અને સંશોધન ક્ષેત્રે મોટા પ્રમાણમાં લોકાર્પણ થશે નહીં. સી.આઈ.આઇ., પી.એચ.ડી. ચેમ્બર જેવી સંસ્થાઓએ પણ આ સૂચિત માર્ગરેખાનો વિરોધ કર્યો છે. 
 

છેલ્લા કેટલાક સમયથી દેશમાં જી.એમ. ટેક્નોલોજી લાવવાનો પ્રયાસ થઈ રહ્યો છે. કેટલીક જાતોમાં તેનો અમલ થવાનો હતો પરંતુ વિરોધને પગલે તેમ થઈ શક્યુ નથી. એટલું જ નહીં કેટલાક રાજ્યોમાં માત્ર ફિલ્ડ ટ્રાયલ ચાલી રહી છે. બી.ટી. કોટનમાં જે સફળતા મળી તેના પગલે મોટા ભાગના ખેડૂતો આ તરફ વળ્યા હતાં, પરિણામે ઇજારા જેવી સ્થિતિ સર્જાતા મોન્સાન્ટો કંપની દ્વારા તેનો ગેરલાભ લેવાયો હોવાની ફરિયાદ પણ ઊઠી હતી. બીજના એક પેકેટનો ભાવ 800 સુધી પહોંચી જતા ખેડૂતોએ પણ તેનો વિરોધ કર્યો હતો. પરિણામે સરકારને દરમિયાનગીરી કરવાની ફરજ પડી હતી. સરકારે મોન્સાન્ટો કંપનીને ભાવ ઘટાડવાની ફરજ પાડતા તેણે ટેક્નોલોજી ટ્રાન્સફર અટકાવવાથી લઈ દેશ છોડી જવાની પણ ચિમકી ઉચ્ચારી હતી. પરિણામે હાલ તુરંત આ અટકી ગયુ છે, પરંતુ જો ટેક્નોલોજી પૂરી પાડનાર દરેક કંપની આ રીતે સરકારનુ નાક દબાવે તો ખેડૂતોને નુકશાની જાય તેવી પૂરી શક્યતા છે. 
 

ટેક્નોલોજી પૂરી પાડવામાં મોટા ભાગે વિદેશી કંપનીઓ જ હોય છે. આપણા દેશમાં સંશોધનના નામે જે કંઈ થોડી પ્રવૃત્તિ થાય છે તે પણ સંસાધનોના અભાવે વેગ પકડી શકતી નથી. તેમાં નાણાંકીય તંગી મોટો ભાગ ભજવે છે. આપણા દેશની કૃષિ યુનિવર્સિટી ઘણા બધા સંશોધનો કરે છે પરંતુ તે સરકારી ગ્રાન્ટ પર નિર્ભર હોવાથી મુક્ત મને તેની પાછળ ખર્ચ કરી શકતી નથી. ગુજરાતમાં 3 સ્થળે કૃષિ યુનિ. કાર્યરત છે. એ લોકો પણ ઘણા બધા સંશોધનો કરે છે પરંતુ તે બધાનો વ્યવહારીકપણે અમલ થઈ શકતો નથી. હવે સ્થિતિમાં તેમને વિદેશી ટેક્નોલોજી પર જ આધાર રાખવો પડે છે, જે સરવાળે મોંઘી હોવાથી ખેડૂતોને સસ્તી કિંમતે બીજ આપી શકાતા નથી. 
ઘણાં બધા રાજ્યોમાં એવી તક રહેલી છે કે, તેઓ મોટા પ્રમાણમાં બીજ પૂરા પાડી શકે તથા ઇનોવેશન પણ કરી શકે, પરંતુ કેટલીક વિદેશી કંપનીઓ તથા હિત ધરાવતા તત્વો સસ્તા દરે બીજ મળે તેમ થવા દેતા નથી. 
 

નવી માર્ગરેખા, નવા સંશોધકો તથા સ્ટાર્ટઅપ માટે પણ પ્રોત્સાહન પૂરૂ પાડતી નથી. એક રીતે જોઈએ તો કૃષિમાં પણ પરંપરાગત ખેતીના સ્થાને પ્રયોગાત્મક ખેતી કરાવવી હોય તથા એકરદીઠ ઉપજ વધારવા માટે જી.એમ. બીજનો ઉપયોગ કરવાનો હોય તો જરૂરી છે કે, બાયોટેક કંપનીઓ સસ્તા દરે ટેક્નોલોજી પૂરી પાડે જેથી બીજ પણ સસ્તા દરે મળી શકે. મોટા ભાગના ખેડૂત સંગઠનોએ એવો આક્ષેપ કર્યો છે કે, કેન્દ્ર સરકારે વિદેશની અગ્રણી બાયોટેક કંપનીઓના દબાણ હેઠળ આ નીતિ ઘડી છે. અત્યાર સુધીમાં 23 રાજ્યોના 3.25 લાખથી વધુ ખેડૂતો પોતાનો વિરોધ કરી ચૂક્યા છે. તેઓ પોતાની માગણી માટે એક વિરાટ આવેદનપત્ર તૈયાર કરી રહ્યાં છે. નીતિ આયોગને પણ આ અંગે રજૂઆત કરવામાં આવી છે. ખેડૂતો માટે બજેટમાં અનેક નાણાં ફાળવતુ કેન્દ્ર ખેડૂતોની આ માંગણી અંગે હકારાત્મક રીતે વિચારશે?

Recommendation

    Don't Miss

    NEXT STORY

    Disclaimer:- Money Bhaskar has taken full care in researching and producing content for the portal. However, views expressed here are that of individual analysts. Money Bhaskar does not take responsibility for any gain or loss made on recommendations of analysts. Please consult your financial advisers before investing.